ၸွမ်သိုၵ်းလူင်ယွတ်ႈသိုၵ်း တူၵ်ႇလၢတ်ႈဝႃႈ လၢႆးႁဵတ်းတၢင်းသၢင်ႈ လူင်ပွင်ၸိုင်ႈၼူၵ်ႉယုင်းလႄႈသိုၵ်းတပ်ႉမတေႃႇ ၵႂႃႇၵေႃႉတၢင်းတၢင်း

ပၢင်လူင်ၼႃႈႁူပ်ႉထူပ်းၵူၼ်းမိူင်းလႄႈသင်၊ ပၢင်ႁၢင်ႈႁႅၼ်းငူပ်ႉငီႉ တီႈတူၼ်ႈတီး တႃႇပဵၼ်မႃးပၢင်ၵုမ်ၵၢၼ်မိူင်း ၸၼ်ႉၸိူဝ်ႉၸၢတ်ႈတႆး တီႈလၢင်းၶိူဝ်းၼႆႉ သင်ဝႃႈၾၢႆႇတပ်ႉမတေႃႇသိုၵ်းမၢၼ်ႈႁူႉပွင်ႇ တိုၼ်းတေပၼ်ၸတ်းႁဵတ်း။ လွင်ႈၼႆႉ ၸွမ်သိုၵ်းလူင်ယွတ်ႈသိုၵ်း ႁူဝ်ပဝ်ႈလူင် RCSS တွပ်ႇလၢတ်ႈ တီႈၸုမ်းၶၢဝ်ႇၽူႈတွႆႇႁွၵ်ႈဝႆႉၼင်ႇၼႆ။

ထၢမ်-ပေႃးႁဝ်းၶႃႈတူၺ်း လိၵ်ႈဢၼ်ဢွၵ်ႇမိူဝ်ႈဝၼ်းတီႈ 19 ၼႆႉၵေႃႈ လူင်ပွင်ၸိုင်ႈမိူင်းတႆးသမ်ႉဝႃႈ တေၸွႆႈထႅမ်။ ၾၢႆႇသိုၵ်းသမ်ႉဢွၵ်ႇလိၵ်ႈမႃးဝႃႈ ယႃႇပေႁဵတ်း။ ဢၼ်ႁၼ်ယူႇၸိူင်ႉၼႆၼႆႉ မၼ်းမိူၼ်ၼင်ႇသိုၵ်းၵေႃႈပဵၼ်ၾၢႆႇၼိုင်ႈ၊ လူင်ပွင်ၸိုင်ႈၵေႃႈပဵၼ်ၾၢႆႇၼိုင်ႈ။ ၾၢႆႇၼိုင်ႈ ဢၼ်သိုၵ်းဢွၵ်ႇလိၵ်ႈသေမႃးႁၢမ်ႈႁႄႉၸိူင်ႉၼႆၶႃႈလူး ၵၢင်ၸႂ်ၾၢႆႇသိုၵ်းၼႆႉ မၼ်းလႅပ်ႈၶႂ်ႈပဵၼ်သင်တႄႉတႄႉၶႃႈ?။

တွပ်ႇ-ပေႃးမႃးတူၺ်းငဝ်းလၢႆးလူင်ပွင်ၸိုင်ႈလႄႈတပ်ႉသိုၵ်းၼႆႉ ဢၼ်ၶႂ်ႈႁဵတ်းလွင်ႈငမ်းယဵၼ်ၼႆႉ ယိူင်းဢၢၼ်းၶဝ်မၼ်းဢမ်ႇပေႃးမိူၼ်ၵၼ်။ လူင်ပွင်ၸိုင်ႈၶႂ်ႈႁဵတ်းပိူင်ၼိုင်ႈ၊ တပ်ႉမတေႃႇၶႂ်ႈႁဵတ်းၶႂ်ႈပဵၼ်ပိူင်ၼိုင်ႈ၊ ယိူင်းဢၢၼ်းၶဝ်သၢၼ်ၶတ်းၵၼ်ဝႆႉ။ လူင်ပွင်ၸိုင်ႈလႄႈ တပ်ႉသိုၵ်းၼႆႉ ပၢႆးဝူၼ်ႉၶဝ်ၶတ်းၵၼ်ဝႆႉသေ မိူဝ်ႈလဵဝ်ငဝ်းလၢႆးၵၢၼ်ငမ်းယဵၼ်ၼႆႉ ၸုမ်းၸၢဝ်းၶိူဝ်း EAOs ႁဝ်းမႃးၶမ်ၵၢင်ၶဝ်၊ ႁဝ်းၼႆႉတၢင်းတပ်ႉသိုၵ်းၵေႃႈလူဝ်ႇလႆႈထွမ်ႇ၊ တၢင်းလူင်ပွင်ၸိုင်ႈၵေႃႈလူဝ်ႇလႆႈထွမ်ႇ၊ ဝၼ်းမိူဝ်ႈၼႆႉ ႁဝ်းတေဢဝ်ဢၼ်လႂ် ႁဝ်းလိူၵ်ႈယၢပ်ႇ။

ထၢမ်-ပေႃးႁဝ်းၶႃႈတူၺ်း တႃႇတေၸတ်းႁဵတ်းပၢင်ၵုမ်ၸၼ်ႉၸိူဝ်ႉၸၢတ်ႈၼႆႉ တေမီးယူႇ 3 ၶၵ်ႉတွၼ်ႈ။ တွၼ်ႈၼိုင်ႈလူင်းႁူပ်ႉထူပ်းၵူၼ်းမိူင်း၊ ထႅင်ႈတွၼ်ႈၼိုင်ႈ ပၢင်ႁၢင်ႈႁႅၼ်းလူင်ႈၼႃႈ ဢုပ်ႇဢူဝ်းၵၼ်၊ ထႅင်ႈတွၼ်ႈၼိုင်ႈ ပၢင်ၵုမ်ၸၼ်ႉၸိူဝ်ႉၸၢတ်ႈ ND တီႈလၢင်းၶိူဝ်း။ ပေႃးတူၺ်းမိူၼ်ၼင်ႇၾၢႆႇသိုၵ်းလၢတ်ႈမိူဝ်ႈလဵဝ်ၼႆႉ ပၢင်လူင်ႈၼႃႈႁၢင်ႈႁႅၼ်းၼႆႉ တေဢမ်ႇပဵၼ်တီႈတူၼ်ႈတီးယဝ်ႉ၊ ပေႃးဢဝ်ၾၢႆႇသိုၵ်းဝႃႈ ဢဝ်ၵူႈမိူင်းမိူင်းဝႃႈ ႁႂ်ႈႁဵတ်းတီႈလၢင်းၶိူဝ်း၊ ပေႃးဢဝ်ယိူင်းဢၢၼ်းဝႃႈ သမ်ႉတေၶႂ်ႈႁဵတ်းတီႈလႂ်ၶႃႈ?။

တွပ်ႇ-ဢၼ်ၼၼ်ႉ တေၶဝ်ႈၸႂ်ၽိတ်းၵၼ်ၵေႃႈပဵၼ်လႆႈ၊ လွင်ႈၼႆႉႁဝ်းတိုၼ်းလူဝ်ႇလႆႈဢုပ်ႇၵၼ်။ ဢၼ်တပ်ႉသိုၵ်းႁၢမ်ႈယူႇၼၼ်ႉ ၶဝ်လႆႈႁၢမ်ႈမႃး ၵွပ်ႈပိူဝ်ႈဢမ်ႇပွင်ႇၵၼ်၊ ဢၼ်ၼႆႉတေလႆႈဢုပ်ႇၵၼ်ၶိုၼ်း။ ၵွပ်ႈပိူဝ်ႈႁဝ်းဝၢင်းၽႅၼ်ဝႆႉ ၶၼ်ႈတွၼ်ႈမၼ်းမီး 3 တွၼ်ႈ၊ ပၢင်လူင်ႈၼႃႈႁူပ်ႉထူပ်းၵူၼ်းမိူင်း ၵႂႃႇဢဝ်ၵၢင်ၸႂ်ၵူၼ်းမိူင်းၵူႈၸႄႈဝဵင်း၊ ပေႃးႁႂ်ႈၵူႈၸႄႈဝဵင်းမႃးတီႈလၢင်းၶိူဝ်းတင်းမူတ်း ဢမ်ႇမီးတီႈယူႇယဝ်ႉ၊ မၼ်းမႃးပဵၼ် 5-6 ႁဵင်။ မိူဝ်ႈလဵဝ်ၼႆႉႁဝ်းသမ်ႉၶႂ်ႈႁုပ်ႈ ႁဝ်းလူင်းၵႂႃႇထၢမ်ၵၢင်ၸႂ်ၶဝ်ၵူႈတီႈၵူႈတီႈ၊ ပွင်ႇဝႃႈႁဝ်းၵႂႃႇႁႃၶဝ်ၵႂႃႇၸူးၶဝ်၊ ၽိုၼ်လိၵ်ႈ 5 တွၼ်ႈၵၼ် (ၵၼ်ႇတ)ၼႆႉၵေႃႈႁဝ်းဢဝ်ပၼ်ၵူၼ်းမိူင်း၊ ႁႂ်ႈၵူၼ်းမိူင်းမီးသုၼ်ႇသႂ်ႇၾွမ်ႊ(ထႅမ်သႂ်ႇ)မႃးပၼ်ႁဝ်း၊ ႁဝ်းလႆႈႁၼ်ၵၢင်ၸႂ်ၶဝ်ဢၼ်တႄႉမၼ်း ဢၼ်ၼႆႉဢၼ်ၼိုင်ႈ။

ပေႃးလႆႈမႃးယဝ်ႉ ၵူၼ်းလူင်ၸိူဝ်းဢၼ်လူင်းၵေႃႈလီ၊ ၸိူဝ်းဢၼ်တၢင်တူဝ်ၸႄႈဝဵင်းၵေႃႈလီ ၼိုင်ႈၸႄႈလႂ် 5-6 ၵေႃႉ ႁဝ်းမႃးၶွၼ်ႈတုမ်/ငီႉၵၼ်တီႈတူၼ်ႈတီး၊ တီႈတူၼ်ႈတီးၼႆႉ မၼ်းဢမ်ႇၸႂ်ႈပၢင်ၵုမ်ယဝ်ႉ၊ မၼ်းပဵၼ်ပၢင်ငူပ်ႉငီႉၵၼ်၊ ငူပ်ႉငီႉၵၼ်တႃႇတေဢွၵ်ႇၽိုၼ်လိၵ်ႈၶိုၼ်ႈမႃး တႃႇတေတၢင်ႇတီႈ ND ၊ ဢၼ်ၼႆႉ လူင်ပွင်ၸိုင်ႈၶဝ်ပွင်ႇယူႇၵေႃႈ တပ်ႉမတေႃႇၶဝ်တေဢမ်ႇပေႃးပွင်ႇ ၶၼ်ႈတွၼ်ႈမၼ်း။ ႁဝ်းမႃးငူပ်ႉငီႉၵၼ်တီႈတူၼ်ႈတီးၼႆႉ လွၼ်ႉမွၼ်းဢၼ်ၵႂႃႇလႆႈမႃးတင်းမူတ်းၼၼ်ႉ ဢဝ်မႃးထတ်းထွင် ၶၢဝ်းတၢင်းသၢမ်ဝၼ်း ဝၼ်းတီႈ 7-8-9 ။ ဢဝ်မႃးထတ်းထွင်ယဝ်ႉ လႆႈလွၼ်ႉမွၼ်းမၼ်းယဝ်ႉ ၸင်ႇၵွႆႈပႃးၵၼ်ၵႂႃႇတီႈ ND ။

ပၢင်ၵုမ် ND ၼႆႉ တေၽိတ်ႈမွၵ်ႇပႃးလုမ်းၽွင်းတၢင်ၶဝ်ၼွၵ်ႈမိူင်းၵူႈမိူင်းမိူင်း ဢၼ်မႃးမီးယူႇတီႈတႃႈၵုင်ႈ။ သမ်ႉတေၽိတ်ႈမွၵ်ႇပႃးၽူႈဢွၼ်ႁူဝ် PPST ၊ ၽိတ်ႈမွၵ်ႇပႃး တပ်ႉမတေႃႇ၊ လူင်ပွင်ၸိုင်ႈမိူင်းတႆး၊ လူင်ပွင်ၸိုင်ႈမိူင်းႁူမ်ႈတုမ်ၸိူဝ်းၼႆႉ ႁႂ်ႈလႆႈမႃးလဵပ်ႈႁဵၼ်း။ ပေႃးႁဝ်းဢမ်ႇႁၢင်ႈႁႅၼ်းလီလီ တေၵႂႃႇတီႈတူၼ်ႈတီးၼႆႉ ၶၢဝ်းယၢမ်းမၼ်းတေသဵင်ႈၼမ်ထႅင်ႈ။ ႁဝ်းႁၢင်ႈႁႅၼ်းဝႆႉတီႈတူၼ်ႈတီးၼႆႉ 3 ဝၼ်း၊ ႁဵတ်း ND တီႈလၢင်းၶိူဝ်းၵေႃႈ 3 ဝၼ်း။ ပေႃးၼႆႁဝ်းၽိူဝ်ႇဝႆႉႁႂ်ႈၸလိပ်ႈသဵင်ႈဢေႇ၊ ႁႂ်ႈမၼ်းသမ်ႉပဵၼ်ၵၢၼ်ၼမ်။ ႁဝ်းၽိူဝ်ႇဝႆႉထႅင်ႈ ပိုၼ်ႉတီႈတီႈဢၼ်ဢမ်ႇပေႃးၼၼ်ႉ လူတ်းတင်းၼမ်ၵူၼ်းထႅင်ႈ။

ၵူၼ်းမႃးတေပဵၼ်ႁဵင်ၼႆႉ ႁဝ်းဢၢၼ်းဢဝ်မွၵ်ႈ 3-4 ပၢၵ်ႇၵူၺ်း တီႈလၢင်းၶိူဝ်းၼႆႉ။ ပေႃးၸိူင်ႉၼႆ ႁဝ်းလူတ်းၸလိပ်ႈထႅင်ႈ လူတ်းၶၢဝ်းယၢမ်းထႅင်ႈ။ ဢၼ်ၼႆႉလူင်ပွင်ၸိုင်ႈၶဝ် တပ်ႉမတေႃႇၶဝ်တေဢမ်ႇပွင်ႇၵေႃႈပဵၼ်လႆႈ။ သင်ဝႃႈၶဝ်ပွင်ႇၼႆ ဢၼ်ဝႃႈဢမ်ႇပၼ်ႁဵတ်းဢၼ်ဝႃႈၼႆႉ တေဢမ်ႇမီးလွင်ႈတၢင်းသင်၊ တိုၼ်းတေလႆႈပၼ်ႁဵတ်းယူႇ။

(ၶႅၼ်းတေႃႈပႂ်ႉသိုပ်ႇဢၢၼ်ႇ လွင်ႈပၢင်လူင်ႈၼႃႈ လူင်းထူပ်းၵူၼ်းမိူင်း ၸွင်ႇၸၢင်ႈလႆႈၶေႃႈလွၼ်ႉမွၼ်း ထုၵ်ႇမႅၼ်ႈ)