ၵေႃလိၵ်ႈလၢႆးလႄႈၾိင်ႈငႄႈတႆး ၸႄႈဝဵင်းသႅၼ်ဝီ ယုၵ်ႉယွင်ႈလုၵ်ႈဢွၼ်ႇႁဵၼ်း ၸိူဝ်းဢွင်ႇပူၼ်ႉၸၼ်ႉသိပ်း ၼႂ်းပီ 2016-2017 တင်းမူတ်း 133 ၵေႃႉ ဝႃႈၼႆ။
ဝၼ်းတီႈ 19/11/2017 တူၵ်းမႅၼ်ႈလိူၼ်ၸဵင်မႂ်ႇ 1 ၶမ်ႈ ပၢင်ပွႆးႁူမ်ၸူမ်းႁပ်ႉတွၼ်ႈပီမႂ်ႇတႆး 2112 ၼီႈ ၵေႃလိၵ်ႈလၢႆး လႄႈၾိင်ႈငႄႈတႆး ၸႄႈဝဵင်းသႅၼ်ဝီ ဢွၼ်ႁူဝ် ၼမ်းၼႃႈ ၸတ်းႁဵတ်းပၢင်ယုၵ်ႉယွင်ႈလုၵ်ႈႁဵၼ်း ၸိူဝ်းဢွင်ႇပူၼ်ႉ ၸၼ်ႉသိပ်းလႄႈ မွပ်ႈယိုၼ်ႈသူးရၢင်းဝလ်း (ၶူဝ်းတွၼ်ႈ) တီႈႁူင်းႁေႃၵေႃလိၵ်ႈလၢႆး ၸႄႈဝဵင်းသႅၼ်ဝီ ၸႄႈတွၼ်ႈလႃႈ သဵဝ်ႈ ၸိုင်ႈတႆးပွတ်းႁွင်ႇ။ ၼင်ႇႁိုဝ် ၵူၼ်းၼုမ်ႇပေႃးတေမီးတင်းၶတ်းၸႂ် ႁဵၼ်းသွၼ်ဢဝ် လႆႈၵူႈၾၢႆႇၾၢႆႇ ဝႃႈၼႆ။
ၼၢင်းသႅင်လၢဝ် ၽူႈၼမ်းၼႂ်းၵေႃလိၵ်ႈလၢႆးလႄႈၾိင်ႈငႄႈတႆး ၸႄႈဝဵင်းသႅၼ်ဝီ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ပၢင်ယုၵ်ႉယွင်ႈၼမ်ႉၸႂ် လုၵ်ႈဢွၼ်ႇႁဝ်းၼႆႉ ဢွၼ်တၢင်းသုတ်း ယုၵ်ႉယွင်ႈလွင်ႈၶတ်းၸႂ်လုၵ်ႈႁဵၼ်းၶဝ်၊ ဢမ်ႇယႅၵ်ႈ ၼိူဝ်ႉလိူတ်ႈၸၢဝ်းၶိူဝ်းဝႃႈ လုၵ်ႈဢွၼ်ႇၶၢင်၊ လွႆ၊ လုၵ်ႈၶိုင်ႈ တႆး-မၢၼ်ႈ ၵေႃႈပႃးၶႃႈ။ ပေႃးႁဝ်းၶႃႈ မေႃ မၵ်းမၼ်ႈ ပၼ်ႁႅင်း ယုၵ်ႉယွင်ႈၸိူင်ႉၼႆ ယုမ်ႇယမ်ဝႃႈ လုၵ်ႈဢွၼ်ႇႁဝ်းၶဝ် တေမီးၸႂ်ၶႂ်ႈၶတ်းၸႂ် ႁဵၼ်းသွၼ်မႃး ၵူႈ ၾၢႆႇၾၢႆႇ။ ယဝ်ႉၵေႃႈ ႁႂ်ႈမီးၸႂ်ၶႂ်ႈလဵပ်ႈႁဵၼ်းပၢႆးပၺ်ၺႃ၊ ႁႂ်ႈမေႃႁၵ်ႉသႃၸိူဝ်ႉၸၢတ်ႈၸဝ်ႈၵဝ်ႇလႄႈ မေႃၸွႆႈထႅမ်ၵၼ် ၸိူဝ်ႉ ၸၢတ်ႈႁဝ်း၊ ႁႂ်ႈပဵၼ်ၼေႃႇတႅၼ်းၶိူဝ်း ဢၼ်တေႁဵတ်းပၼ်ၽွၼ်းလီ ၸိူဝ်ႉၶိူဝ်း ၽႃႇသႃႇ ပေႃႈ မႄႈပီႈၼွင်ႉၽႂ် မၼ်းၵႂႃႇမိူဝ်းၼႃႈ” ဝႃႈၼႆ။
ၼႂ်းပီ 2016-2017 လုၵ်ႈႁဵၼ်း ဢွင်ႇပူၼ်ႉၸၼ်ႉသိပ်း တင်းမူတ်း 133 ၵေႃႉ ဢၼ်လႆႈလၢဝ်ၸွင်ႈ 6 လုၵ်ႈ 1 ၵေႃႉ ပဵၼ် ၸၢႆးႁၢၼ်ႁၵ်ႉ၊ ဢၼ်လႆႈ 5 လုၵ်ႈ 2 ၵေႃႉ ၸၢႆးမၢၼ်ႇၾႃႉ လုၵ်ႈၸၢႆးၸိင်ႇလူႇ ၽူႈတႅၼ်းသၽႃးၸႄႈမိူင်း ၶဵတ်ႇ လိူၵ်ႈတင်ႈ မၢႆ(2) ၸႄႈဝဵင်းသႅၼ်ဝီ။ ၸၢႆးမျိၼ်ႉမူဝ်ႇထုတ်ႉ။ ဢၼ်လႆႈ 4 လုၵ်ႈသမ်ႉ 1 ၵေႃႉ ၸၢႆးၵွင်းထႅတ်ႉ။ လိူဝ်ၼၼ်ႉ လုၵ်ႈႁဵၼ်း ဢၼ်လႆႈ 1 လုၵ်ႈ၊ 2 လုၵ်ႈလႄႈ ဢၼ်ဢွင်ႇပူၼ်ႉၸၼ်ႉ ၸဵမ်ၸိူဝ်းၼႆႉ ဝႃႈၼႆ။
လုၵ်ႈႁဵၼ်း ဢၼ်ဢွင်ႇၸၼ်ႉသိပ်း ပီ 2016-2017 ၼႆႉ ယူႇတီႈၵေႃလိၵ်ႈလၢႆး ၸႄႈဝဵင်းသႅၼ်ဝီ လႆႈမွပ်ႈယိုၼ်ႈသူး ရၢင်းဝလ်းလႄႈ ဝႂ်ယုၵ်ႉယွင်ႈ ၼႂ်းပၢင်ပွႆး ႁူမ်ၸူမ်းႁပ်ႉတွၼ်ႈပီမႂ်ႇတႆး 2112 ၼီႈ ၸၢႆး 51 ၵေႃႉလႄႈ ယိင်း 82 ၵေႃႉ ဝႃႈၼႆ။
